8.07.2007 - Turen gjekk frå Høgsetra kl. 10 med Ståle Rønningen som turleiar.
Målet for turen var fangstanlegget på Kviknegråhøa. (Sjå eigen artikkel om dette fangstanlegget under Kulturminner). Dagen var fin for fjelltur, men me unngjekk ikkje regnskurene som vanleg denne sommaren.
Det var 18 frammøtte interesserte personar og 15 av desse var med heile turen.
Fleire var lokalkjente folk som fortalte om fjellet og ting dei hadde opplevd. Det blei m.a. fortalt at det gamle navnet på Kviknegråhø tidlegare var Blåfjell, i alle fall for heidølane.
Høa ser blå ut om sommaren frå Heidalssida. Dette navnet er også brukt på eit gamalt kart frå 1778. Det er også feil på kartet med Brannfjell. Brannfjell er den toppen NNV for Kviknegråhøa med høgde 1212. NNØ for Kviknegråhøa ligg Slettbrannfjell,
dette er kalla Brannfjell på dagens kart.
Etter rasting ved fangstanlegget blei det inngåande studert. Ein del nord for anlegget blei det funne rester av ei stolperekke over ei kortare strekning. Dette lyt undersøkast nærare seinare.
Vel nede på seterstulen att synte turleiaren oss ei elggrav. Denne brukte ungane å fylle med vatn om sommaren og fekk såleis eit ypperleg badebasseng.